Corde iucundo, calamo uenusto
Litteras mittis cupiente uoto,
Blanda conscribens serie salutis,
Care Gregori:
5
Exigens nuper noua me mouere
Metra quae Sappho cecinit decenter,
Sic Dionaeos memorans amores,
Docta puella.
Pindarus Graius, meus inde Flaccus
10
Sapphico metro, modulante plectro
Molliter pangens citharista, blando
Carmine lusit.
Cur mihi iniungis lyricos melodes,
Voce qui rauca modo uix susurro?
15
Eloqui chordis mea dextra nescit
Pollice dulci.
Qui uel haec olim mihi si fuissent
Nota prudentum docili Camena,
Per tot oblitus fueram benignam
20
Tempora Musam:
Cum labor doctis sit, ut ista pangant
Dogma nec quisquam rapienter intret
Et satis constent resonare paucis
Metra poetis.
25
Non leue est nautae rate transfretare
Vincere aut uastum pelagus natatu;
Vix procelloso repetunt sub austro
Carbasa portum.
Arduum nobis iter et profundum,
30
Quo iubes pergi: tamen ibo uotis;
Si minus possum pedibus uiare,
Ducor amore.
Praestitit, pastor, tua mi uoluntas
Codicem farsum tumido cothurno
35
Quemque paupertas mea uix ualebat
Tangere sensu.
Regiis uerbis humili repugnat,
Diuites uersus inopi recusans
Et mihi Mopso reserare nolens
40
Docta sophistis:
Disputans multum uariante milto
Quaeque sunt rythmis uel amica metris,
Sapphicum quantum trimetrumue adornet
Dulcis epodus.
45
Multus auctorum numerus habetur
Plura dicentum modulo canoro
Quae uolens isto memorare metro
Nomina frango.
Maxime qui nunc resolutus arte
50
Postque bis denos loquor istud annos,
Clara quod scripsit citharam terendo
Lesbia uirgo.
Scire qui uult haec, Libycas harenas
Ante per litus numerare tendat,
55
Cuncta quam metris ratione cauta
Carmine cingat.
Nam moras feci, remoratus ipse,
Pluribus causis modo hinc et inde,
Nec uacans legi placida quiete
60
Dulce sophistae.
Scito nam, pastor, nec adhuc cucurri
Ordinem totum religens libelli;
Sed satis, crede, est, satis est amanti
Sola uoluntas.
65
Ergo laxatus celeri uolatu
Ad patrem sacrum comitante uoto
Et sibi nostrum renouans amorem
Perge, libelle.
Forte non possum piger ire gressu
70
Quo uocat blandus meus ille uultus:
In uicem nostram, rogo te, libelle,
Redde salutem.
Sit memor fili pater, ore dulci
Hunc precans qui nos, mare et astra fecit,
75
Ac piis uotis bene se colentem
Pectore seruet;
Feminae carae, sibi mente nexae
Quem colunt, Agnes, Radegundis: idem,
Sicut exposcunt uice filiarum,
80
Solue salutem.
Adde Iustinam pariter precantem,
Nempe commendans famulam propinquam,
Et refer quantum sibi cara profert
Neptis honorem.
85
Haec tibi promptus prece uoce mente
Soluo, uix implens, ego pauper arte,
Sed tamen largo refluens amore,
Care Gregori.