Venantius Fortunatus carminum libri 9, 3

Altre sezioni


Post tempestates et turbida nubila caeli,

      Quo solet infesto terra rigere gelu,

Post ualidas hiemes ac tristia frigora brumae,

      Flamine seu rapidi rura grauante noti,

5

Succedunt iterum uernalia tempora mundo

      Grataque post glaciem prouocat aura diem.

Rursus odoriferis renouantur floribus arua,

      Frondibus arboreis et uiret omne nemus;

Dulce saporatis curuantur robora pomis,

10

      Et redeunte sibi gramine ridet ager.

Sic quoque iam, domini, post tristia damna dolentes

      Vos meliore animo laetificate, precor.

Ecce dies placidi reuocant paschalia Christi,

      Orbs quoque totus item per noua uota fremit.

15

Gaudia plus faueant per celsa palatia regum

      Et per uos famuli festa beata colant.

Omnipotens nobis uestram addat in orbe salutem

      Atque diu patriam culmina uestra regant.