Venantius Fortunatus carminum libri 8, 8

Altre sezioni


O regina potens, aurum cui et purpura uile est,

      Floribus ex paruis te ueneratur amans.

Et si non res est, color est tamen ipsa per herbas:

      Purpura per uiolas, aurea forma crocus.

5

Diues amore dei uitasti praemia mundi:

      Illas contemnens has retinebis opes.

Suscipe missa tibi uariorum munera florum,

      Ad quos te potius uita beata uocat.

Quae modo te crucias, recreanda in luce futura,

10

      Aspicis hinc qualis te retinebit ager.

Per ramos fragiles quos nunc praebemus olentes

      Perpende hinc quantus te refouebit odor.

Haec cui debentur precor ut, cum ueneris illuc,

      Meque tuis meritis dextera blanda trahat.

15

Quamuis te expectet paradisi gratia florum,

      Isti uos cupiunt iam reuidere foris.

Et licet egregio uideantur odore placere,

      Plus ornant proprias te redeunte comas.