Saepius optaram fieri me remige nauta,
Cursibus undifragis ut ratis iret aquis
Flatibus aut rapidis per dorsa Garonnica ferrer,
Burdigalense petens ut celer actus iter,
5
Velaque fluctiuagum traherent Aquilone secundo.
Me quoque litoreo redderet aura sinu
Qua pius antistes sacra Gundegisilus offert,
Culmine pro populi qui micat ara dei:
Tu quoque quo resides meritis, comes, ample serenis,
10
Care Galactori, sedula cura mihi,
Cui rite excellens rex Gunthechramnus honores
Maius adhuc debet, qui tibi magna dedit.
Cum tamen hoc uellem, timor obstitit aestibus ille
Qui cumulo rapidae mons fremit albus aquae.
15
Dulcedo inuitat ciuilis et unda repugnat:
Sic uocat atque uetat hinc amor, inde pauor.
Plane hoc quod superest soluat uel epistula currens:
Littera, quod facerem, reddat amore uicem.
Maxime nunc igitur te, dulcis amice, saluto,
20
Sperans a domino te superesse diu.
Cumque domo sociis antistite coniuge natis
Viue comes, cui sint iura regenda ducis.
Pontifici summo commender, opime, precatu,
Sic tua pars meritis sit data dextra polis.
25
Si superest aliquid quod forte tributa redundent:
Qui modo mitto apices, te rogo mitte pices.