Venantius Fortunatus carminum libri 7, 21

Altre sezioni


Nomina amicorum mihi dulcis epistula pandit:

      Hinc Sigimunde nitens, hinc Alagisle decens.

Prosperitas felix uentorum flamina fudit,

      Quando mihi caros nuntiat aura uiros.

5

Testor utrumque caput, tantum mea uota iuuantur

      Quantum fit florens laeta sub imbre seges.

Ne sitiam rabidis aestiuo tempore flammis,

      Nectarei fontis me recreastis aquis.

Post Italas terras mittis mihi, Rhene, parentes;

10

      Aduentu fratrum non peregrinus ero.

Tempore belligero pacis noua gaudia surgunt,

      Hi quia uenerunt quos meus optat amor.

Qui mihi festiuae diei duplicastis honorem,

      Sic uester crescat munere regis honor.