Venantius Fortunatus carminum libri 7, 20

Altre sezioni


Fixus amore tuo uotis inhiantibus astans

      Quae tibi, care, salus, saepe requiro uiros:

Quisque uiator adest properans Aquilonis ab axe,

      Quamuis festinum sollicitando moror;

5

Seu priuata uirum seu publica cura citabit,

      Hinc, nisi perconter, nullus abibit iter.

Quam uegetus membris? quae te loca, care, coercent?

      Ordine disposito cuncta requirit amor.

Si grauis arma tenens Italas terit hospes harenas

10

      Aut quae Francus habet pagina pandat age.

Quid geris, oro, refer; tamen ut queo longius opto

      Viuas pars animae dimidiata meae.