Venantius Fortunatus carminum libri 6, 9

Altre sezioni


Expecto te, noster amor, uenerande Dynami,

      Quamuis absentem quem mea cura uidet.

Quae loca te teneant uenientia flabra requiro;

      Si fugias oculos, non fugis hinc animos.

5

Massiliae tibi regna placent, Germania nobis:

      Vulsus ab aspectu pectore iunctus ades.

Quo sine te tua pars hucusque oblita remansit

      Nec reuocas animo membra relicta tuo?

Si sopor obrepsit, tibi me uel somnia narrent,

10

      Nam solet unianimes ipsa uidere quies.

Si uigilas, fateor, ueniam tibi culpa negabit;

      Nil unde excuses desidiosus habes.

Altera signiferi reuolutis mensibus anni

      Solis anhelantes orbita lassat equos,

15

Cum mea discedens rapuisti lumina tecum,

      Et modo nil sine te cerno patente die.

Vel mihi uerba dares de fonte refusa loquaci,

      Vt faceret tecum pagina missa loqui.

Sed tamen ut tandem uenias huc carius hortor,

20

      Et reuocas oculis lumen, amice, meis.