Si pietatis opus numquam morietur in aeuo,
Viuis pro merito, femina sancta, tuo,
Inclita sidereo radians, Eufrasia, regno:
Nec mihi flenda manes, cum tibi laeta places.
5
Terrae terra redit, sed spiritus astra recepit:
Pars iacet haec tumulo, pars tenet illa polum.
Corpore deposito, leuiori uecta uolatu,
Stas melior caelo, quam prius esses humo.
Carnis iniqua domans, de te tibi, sancta, triumphans,
10
Ad patriae sedes ciuis opima redis.
Ardua nobilitas proauorum luce coruscans
Plus tamen es meritis glorificanda tuis.
Vir cui Namatius datus inde Vienna sacerdos,
Coniuge defuncto consociata deo.
15
Exulibus uiduis captiuis omnia fundens
Paupertate pia diues ad astra subis.
Aeternum mercata diem sub tempore paruo
Misisti ad caelos quas sequereris opes.
Sed rogo per regem paradisi gaudia dantem:
20
Pro Fortunato supplice funde precem.
Obtineas uotis, haec qui tibi carmina misi
Vt merear claudi quandoque claue Petri.