Hoc iacet in tumulo non flenda infantia fratrum,
Quos tulit innocuos uita beata uiros.
Vno utero geniti simili sunt sorte sepulti,
Et pariter natos lux tenet una duos.
5
Lotus fonte sacro prius ille recessit in albis,
Iste gerens lustrum ducitur ante deum.
Nomine sed primus uocitatus rite Iohannes,
Alter, Patricius, munere maior erat:
De cuius merito se plurima signa dederunt;
10
Felices animae, quae pia uota colunt!
Hic etiam felix genetrix requiescit eorum,
Quae meruit partu lumina ferre suo.