Quisquis in hoc tumulo cineres uis nosse sepulti:
Brumachius quondam fulsit in orbe potens.
Quem sensu, eloquio legati nomine functum,
Dum remeat patriae, sors inimica tulit.
5
Finibus Italiae raptus, sed Frigia coniunx
Detulit huc cari funus amando uiri.
Ceu uiuum coluit cui grata est umbra mariti:
Coniugibus castis ipsa fauilla placet.
Ipse quater denos permansit in orbe per annos;
10
Mox obit et magnum parua sepulchra tegunt.