Venantius Fortunatus carminum libri 4, 14

Altre sezioni


Vita breuis hominum, sed non breuis illa piorum,

      Dum migrante die prosperiora tenent.

Qui meruere magis de carcere carnis euntes

      Post tenebras mundi luce perenne frui.

5

Ex quibus hic recubans meritis Praesidius almis

      Carne tenet tumulum, spiritus igne polum.

Pectore de proprio Christi responsa rigando

      Multorum extinxit fonte fluente sitim.

Inuitans instanter oues ad pascua regis

10

      Distribuit dulcem fratribus ore salem.

Nam quotiens monachus peccati est uulnere fixus

      Missus ad artificem, certa medella fuit.

Ibat ad abbatem famulans sanctumque magistrum

      Discipulus humilis, qui fuit ante tumens.

15

Talibus officiis intentus amore Tonantis

      Inter et angelicos fulget honore choros.