Venantius Fortunatus carminum libri 4, 11

Altre sezioni


Quisquis ab occasu properas huc, quisquis ab ortu,

      Munus in hoc tumulo quod uenereris habes.

Respice ditatum caelesti dote talentum,

      Cuius semper habet pectoris arca deum.

5

Religionis apex, uitae decus, arma salutis

      Eximius meritis Victorianus adest,

Dignum opus exercens qui fructificante labore

      Cunctis, non soli uixit in orbe sibi.

Plurima per patriam monachorum examina fundens

10

      Floribus aeternis mellificauit apes.

Lingua potens, pietas praesens, oratio iugis:

      Sic fuit, ut iam tum totus ad astra foret.

Plura salutiferis tribuens oracula rebus

      Saepe dedit signis uita beata fidem.

15

Bis senis rexit patrio moderamine lustris

      Rite deo placitas pastor opimus oues.

Calle sequens recto sacra per uestigia Christum,

      Nunc fruitur uultum quem cupiebat amor.