Venantius Fortunatus carminum libri 4, 10

Altre sezioni


Omne bonum uelox fugitiuaque gaudia mundi;

      Prosperitas hominum quam cito rapta uolat!

Malueram potius cui carmina ferre salutis,

      Peruerso uoto flere sepulchra uocor.

5

Hoc recubant tumulo uenerandi membra Leonti,

      Quem sua pontificem fama sub astra leuat.

Nobilitas altum ducens ab origine nomen,

      Quale genus Romae forte senatus habet;

Et quamuis celso flueret de sanguine patrum,

10

      Hic propriis meritis crescere fecit auos:

Regum summus amor, patriae caput, arma parentum,

      Tutor amicorum, plebis et urbis honor,

Templorum cultor, tacitus largitor egentum,

      Susceptor peregrum distribuendo cibum.

15

Longius extremo si quis properasset ab orbe,

      Aduena mox uidit, hunc ait esse patrem;

Ingenio uiuax, animo probus, ore serenus,

      Et mihi qualis erat pectore flente loquor.

Hunc habuit clarum, qualem modo Gallia nullum;

20

      Nunc humili tumulo culmina celsa iacent.

Placabat reges, recreans moderamine ciues:

      Gaudia tot populis, heu, tulit una dies.

Lustra decem felix et quattuor insuper annos

      Vixit, et a nostro lumine raptus obit.

25

Funeris officium, magni solamen amoris,

      Dulcis adhuc cineri dat Placidina tibi.