Hostis inique, Adam paradiso fraude repellis:

      Ecce deus famulos praestat adire polos.

Inuide, sic tua mors homini meliora parauit:

      Tu expellis terris, hic dat et astra suis.

5

Testis et antestis Gallus probat ista beatus,

      Nobilis in terris, diues eundo polis.

Qui Christi auxilio fultus nec adultus in annis,

      Se maiora petens, odit amore lares.

Effugit amplexus patrios matremque relinquit:

10

      Qui monachum regeret, quaeritur abba parens.

Illic tiro rudis generoso coepit ab aeuo

      Militiae domini belliger arma pati.

Quintiano demum sancto erudiente magistro

      Pulchrius est auro corde probatus homo.

15

Inde palatina regis translatus in aula,

      Theuderice, tuo uixit amore pio.

Mox ubi destituens terras petit astra magister,

      Cessit discipulo cura tuenda gregem.

Pontificatus enim moderans ita rexit habenas,

20

      Pastor ut officiis esset, amore pater,

Mansuetus patiens bonus aequus amator amandus;

      Non erat offensae, sed locus hic ueniae.

Si qua superuenit, facta est iniuria uirtus:

      Vnde furor poterat, inde triumphus erat.

25

Plebem uoce fouens quasi natos ubere nutrix,

      Dulcia condito cum sale mella rigans,

Hoc opus exercens praesciit dona futuri,

      Se pastore nihil posse perire gregi.

Sic pater ecclesiam regit in quinquennia quinque,

30

      Bis terdena tamen lustra superstes agens.

Hinc meliore uia sanctum ad caelestia uectum

      Non premit urna rogi, sed tenet ulna dei.