Venantius Fortunatus carminum libri 2, 13

Altre sezioni


Lucida perspicui nituerunt limina templi,

      Quo capit haud dubiam spem ueneranda fides.

Haec est aula Petri, caelos qui claue catenat,

      Substitit et pelagus quo gradiente lapis.

5

Sedibus his Paulus habitat, tuba gentibus una,

      Et qui praedo prius, hic modo praeco manet.

Martini domus est, Christum qui uestit egentem,

      Regem tiro tegens et homo iure deum.

Ecce sacerdotis sacri micat aula Remedi

10

      Qui tenebras mundi liquit et astra tenet.

Cultor opime dei templum, Trasarice, locasti:

      Has cui persoluis reddet amator opes.