Venantius Fortunatus carminum libri 2, 11

Altre sezioni


Ardua sacrati baptismatis aula coruscat,

      Quo delicta Adae Christus in amne lauat.

Hic pastore deo puris grex mergitur undis,

      Ne maculata diu uellera gestet ouis.

5

Traxit origo necem de semine, sed pater orbis

      Purgauit medicis crimina mortis aquis.

Hanc tamen antistes Sidonius extulit arcem,

      Qui domini cultum templa nouando fouet.

Struxit Berthoarae uoto complente sacerdos,

10

      Quae decus ecclesiae cordis amore placet.

Catholicae fidei splendor, pietate coruscans,

      Templorum cultrix, prodiga pauperibus

Seminat unde metat fruges, spargendo recondens:

      Terrenis opibus non moritura parat.

15

Filia digna patri te, Theudebercthe, reformans,

      Rexisti patriam qui pietate patris

Et comitante fide reuocasti ex hoste triumphos;

      Sed capti pretio mox rediere tuo.

Ecclesiae fultor, laus regum, pastor egentum,

20

      Cura sacerdotum, promptus ad omne bonum,

Cuius dulce iugum nullus gemuisse fatetur,

      Viuis adhuc meritis rex in amore tuis.