Vexilla regis prodeunt,
Fulget crucis mysterium,
Quo carne carnis conditor
Suspensus est patibulo.
5
Confixa clauis uiscera
Tendens manus, uestigia
Redemptionis gratia
Hic immolata est hostia.
Quo uulneratus insuper
10
Mucrone diro lanceae,
Vt nos lauaret crimine,
Manauit unda et sanguine.
Impleta sunt quae concinit
Dauid fideli carmine,
15
Dicendo nationibus:
Regnauit a ligno deus.
Arbor decora et fulgida,
Ornata regis purpura,
Electa digno stipite
20
Tam sancta membra tangere!
Beata cuius brachiis
Pretium pependit saeculi!
Statera facta est corporis
Praedam tulitque Tartari.
25
Fundis aroma cortice,
Vincis sapore nectare,
Iucunda fructu fertili
Plaudis triumpho nobili.
Salue ara, salue uictima
30
De passionis gloria,
Qua uita mortem pertulit
Et morte uitam reddidit.