Venantius Fortunatus carminum libri 1, 19

Altre sezioni


Inter opima ferax qua uoluitur unda Garonnae,

      Vereginis ripis uernat amoenus ager:

Hic breuis ascensus leni subit aggere cliuum,

      Carpit et obliqua molle uiator iter;

5

Altior a planis aruis minor eminet altis:

      Nec humilis nimium necue superbit apex.

Colle sedet medio domus aedificata decenter,

      Cuius utrumque latus hinc iacet, inde tumet.

Machina celsa casae triplici suspenditur arcu,

10

      Quo pelagi pictas currere credis aquas.

Exilit unda latens uiuo generata metallo,

      Dulcis et irriguo fonte perennis aquae;

Quo super accumbens celebrat conuiuia pastor

      Inclusoque lacu pisce natante bibit.

15

Nunc renouanda uenit papae mercede Leonti,

      Quem dominum longo tempore culta cupit.