Venantius Fortunatus carminum libri 1, 11

Altre sezioni


Qui cupis egregii structorem noscere templi,

      Tam pia non patiar uota latere tibi.

Longius hinc olim sacra cum delubra fuissent

      Et plebs ob spatium saepe timeret iter,

5

Exiguam dederat hic praesul Amelius arcem,

      Christicolam populum nec capiente loco:

Quo uitae claudente diem dehinc prole graduque

      Venit ad heredem hoc opus atque locus,

Fundauitque piam hanc papa Leontius aulam,

10

      Obtulit et domino splendida dona suo.

Quam uenerandus habet propriam Dionysius aedem,

      Nomine sub cuius sanctificata nitet;

Qui feruente fide, Christi solidatus amore,

      Vertice supposito colla secanda dedit.

15

Membrorum contemptor erat cupiendo coronam.

      Vile putans quicquid ferret amore dei.

Vt moritura caro donum immortale pararet,

      Vulnera dilexit, sed caritura nece;

Hostili occurrens gladio se misit Olympo:

20

      Vnde mori uoluit, uota salutis habet.

Nec angusta prius subtraxit fana sacerdos,

      Haec nisi perficeret quae modo culta placent,

Assidue in prisco peragens caerimonia templo.

      Donec rite sequens consolidasset opus.