Quisquis ad haec sancti concurris limina templi,
Si uenias supplex, hic prece sumis opem.
Quam sacer antistes Vitalis condidit arcem,
Culmine quae celso est tempore ducta breui:
5
Fundauit, struxit, dotauit, deinde dicauit
Et meruit templi soluere uota sui.
Quo ueneranda pii requiescunt uiscera Petri,
Qui meruit solus claue ligare polos:
Paulus apostolica simul hac retinetur in aula,
10
Seductor quondam qui modo doctor ouat:
Hanc sacer Andreas propriam sibi uindicat arcem
Et cum fratre pio participata regit;
Haec sua tecta replet Laurentius igne sereno,
Cui pia flamma dedit luce perenne diem;
15
Vitali domus ista placet, qui uiuus harenis
Defossus meruit perdere mortis iter:
Sunt loca Martini qui texit ueste tonantem:
Ne magis algeret, se spoliare dedit;
Ecce Vigili arx est quem rustica turba peremit:
20
Vnde mori uoluit, mors magis ipsa fugit;
Incolit haec pariter Marturius atque Sisennus,
Quos genus atque fides et tenet una salus;
Sanctus Alexander felixque Cicilia pollent,
Quos meritis omnes una corona manet.
25
Haec bonus antistes Vitale urguente Iohannes
Condidit egregio uiscera sancta loco.
O nimium felix, aeternum in lumen iture,
Cuius uita suo proficit ista deo!