Nauta rudis tumido cum uult dare uela profundo

      Atque procellosas nescius intrat aquas,

Raucisono latrante salo cum perstrepit aequor

      Et uaga terrifico murmurat unda freto,

5

Exsiliens pelagus colles ubi uoluit aquosos

      Planaque dorsa malis mobile rupe tument,

Naufragii cumulos rapiens per confraga pontus,

      Qua crepitat rapidus monte natante liquor:

Certatim implicitam quatiunt uada caerula cumbam,

10

      Cum liquidi campi pensile transit iter.

Si fera crescat hiems, ut spumis uerberet auras

      Et mare caeruleum tollat ad astra caput,

Fluctibus excussus per nubila nauita currit,

      Intrat et aerias pendula prora uias.

15

Pars subit una ratis, pars altera uergit harenis,

      Nutat et in dubio lubrica libra freto.

Nunc sursum inspicitur pelagi furibunda ruina,

      Pontus et iratas desuper armat aquas,

Nunc quoque prosiliens Zephyri pelagique repulsu

20

      Fluctibus ex imis euolat acta ratis.

Afficitur tremulis temerarius arbiter undis

      Et stupet implicitas quas petat arte uias.

Attonitus trepidus hebetans uagus anxius anceps

      Confuso ingenio mox ope nauta caret.

25

Iamque gubernaclum amittens ratione regendi

      Pondere uictus aquae nescius arte iacet.

Sic ego de modicis minimus, uenerabilis Agnes

      Cum Radegunde sacra, quas colo sorte pia,

Tendere pollicitum quia cogor ad ardua gressum,

30

      Impellis tantis uiribus impar agor.

Fluctuat ingenium cui non natat unda Camenae,

      Sensus harenosus non rigat ore lacus.

Nam celsum meritis Martinum ad sidera notum,

      Cum sint uota, mihi non ualet arca loqui.

35

Poscendum est uobis, ne naufraga prora laboret

      Flatibus ille suis ut mea uela iuuet.

Credere tunc potero ad portum mea carbasa ferri,

      Aspirante fide si sua flabra fauent.

Ferte precanter opem et de uerbo poscite uerba:

40

      Si fons ille rigat, riuulus iste meat.

Vos date quod uobis cum fenore reddat alumnus,

      Addam ut thesauris parua talenta suis.