Post euangelicum bisseni dogma senatus,
Quod regnum Christi toto iam personat orbe,
Postque sacrum Pauli stilum, quo curia mundi
Victa suos tandem stupuit siluisse sophistas,
5
Arctous, Martine, tibi in extrema recessus
Panditur inque uia fidei patet inuia tellus.
Virtutum signis meritorum et laude tuorum
Excitat affectum Christi Germania frigens,
Flagrat, et accenso Diuini Spiritus igne
10
Soluit ab infenso obstrictas Aquilone pruinas.
Immanes uariasque pio sub foedere Christi
Adsciscis gentes. Alamannus, Saxo, Toringus,
Pannonius, Rugus, Sclauus, Nara, Sarmata, Datus,
Ostrogothus, Francus, Burgundio, Dacus, Alanus,
15
Te duce, nosse Deum gaudent. Tua signa Sueuus
Admirans didicit fidei quo tramite pergat,
Deuotusque tuis meritis haec atria claro
Culmine sustollens, Christi uenerabile templum
Constituit, quo clara uigens, Martine, tuorum
20
Gratia signorum uotis te adesse fatetur
Electum, propriumque tenet te Gallia gaudens
Pastorem, teneat Gallicia tota patronum.