Quis tam diuerso concludens atria cultu
Miscuit urbanis ruris amoena locis?
Inter tecta domus siluas miramur et undas
Atque uno fruimur tempore cuncta simul.
5
Hic gelidi fontes, hic dulces arboris umbrae,
Hic uideas toto quidquid in orbe placet.
Impendet uitreis sublimis platanus undis,
Aspecta inque suo gurgite silua tremit.
Dumque niger patula contexitur arbore lucus
10
Frigida torpentes adiuuat umbra lacus.
Aestibus in mediis uiridi sub fronde canora
Vernat auis, resonant atria, tecta, nemus.
Et quae sola nimis poterant diuisa placere
Amplius haec duplo mixta decore nitent.