Respice, qui gressum sinuas per amoena uirecta,
Vt discas cultis lucem praeferre diserti.
Arridet germen quod linguae pingitur ostro,
Ver habet in bruma qui flores carmine gignit,
5
Per glaciem zephyros exhalant uerba tepentes.
Ebria fulgenti maduerunt murice dicta.
Omnibus in rebus sermonum purpura regnat:
Oris ad imperium summittunt colla chelydri.
Algida cum roseo iuueniscant sanguine corda,
10
Primaeuos gelidis ostendit littera membris.
Vertit ad obsequium naturae munera doctus
Aetates species mensuras tempora formas.