Caelo ferunt Ambrosium
Nomen honor uel actio.
Nil debet hic facundiae,
Dos omnis est a moribus.
5
Fortis iuuantem non cupit
Vmbone munitus suo.
In carne nil carnis egit:
Regina mens in corpore
Confregit omne lubricum.
10
Sic uixit ille non sibi,
Sed totus auctori deo.
Adiectus hinc apostolis
Reduxit expulsam fidem.
Dixit triumphos martyrum
15
Linguae uirentis laureis.
Hic ore praedam sustulit
De fauce serpentis feri.
Qui bella Christi militat.
Huius timetur ensibus.
20
Viuit sepultus et iuuat
Clauum tenens ecclesiae.
Iustina uirus perdidit,
Dat poena uati praemium.
Sedis memento, lux, tuae,
25
Exorna, sancte, posteros,
Auctore fultos nobili,
Ne dux sereni culminis
In nube tectus horreat!
Qui pastor est antistitum,
30
Quod fucat omne summouet,
Gregem gubernat principum,
Magister est docentium.