Et hoc supernum munus est,
Quod lingua linguis militat.
Quis non tonantis praemia
Per dona eiusdem praeferat?
5
Facit loquendo qui sapit,
Dignum loquatur ut deo.
Infundit ecce spiritus
Et ora rursus instruit.
Intrat ueterno pectora
10
Euiscerata nubilo.
In hoc apostolis die
Dum uerba Verbum diuidit,
Sermone mundi praepotens
Et corda mundi contulit.
15
Summis feratur laudibus!
Homo habet ora gentium:
Thrax Gallus Indus unus est.
Quod blanda ludit Graecia,
Quod saeuit atrox barbarum
20
Stridor Canopi murmuris,
Quod lingua latrat Parthica,
Pectus repleuit hospitum.
Mundi ad salutem curritur
Nolente mundo tot uiis.
25
Quid! sacra nunc remissio
Paschalis instar gratiae,
Dum mysticam septemplici
Ornat coronam munere.
Augmenta plenitudinis
30
Opes ministrant diuiti.
Nunc mente uoce psallite:
Hoc nostra debet mens deo.