Christicolas inter populos animasque sacratas,
Quis patet angusti peruia porta poli,
IVLIVS unigenae diui uenerator AVITVS
Siderea fruitur lege pari domibus;
5
Corporeamque solo faecem tabemque relinquens
Purpureum domini purus adit solium.
Accipe sublimem, gratantum turba piorum,
Consortemque tene, casta corona, uirum.
Illi perfidiae perpes metus ac fuga fraudis,
10
Fucis et maculis mens inimica fuit.
Seruator recti semperque probator honesti
Fecunda largi fruge boni uiguit.
His laudum titulis ingentes addidit auctus
Consilium felix diues et eloquium.