Canticum laudis domino canentes
Hunc diem festum celebremus omnes,
Quo Seuerinus penetrauit almus
Celsa polorum.
5
Quis stilo diues modulansque plectro
Cuncta signorum replicare possit,
Quae potens Christus studiis opimis
Contulit eius?
Inclitus uates nimiumque felix,
10
Saepius cui deus intimabat
Tunc ad oppressi populi salutem
Multa futura.
Voce praesaga laqueos latronum
Atque praedonum machinas retexens
15
Valde tutabat monitis supernis
Oppida fessa.
Dulce solamen miseris ministrans
Horridam pestem famis amputauit,
Barbara plures feritate uictos
20
Soluit ab hoste.
Magne confessor, humilis magister,
Tu quidem normam monachis dedisti,
Calle demonstrans sobrio sequaces
Scandere caelum.
25
In tuis sanctis manibus refulsit
Caelitus lumen refluensque creuit
Ad tuos haustus olei liquamen
Fontis ad instar.
Condolens cunctos inopes fouebat,
30
Languidos sanans releuabat aegros:
Omnis accedens salubrem medelam
Sumpsit ab illo.
Tuque Siluinum loculo iacentem,
Fratribus coram precibus peractis,
35
Morte deuicta redire fecisti ad
Gaudia uitae.
Cereos flamma fidei cremante
Arguit sanctus pater infideles:
Moxque flammescunt deitatis igne
40
Algida corda.
Cuius ad funus ueniens sacratum
Mutus accepit modulos loquelae,
Caecus exultat procul ambulantes
Cernere notos.
45
Neapolis, gaude redimita festis,
Plaude caelestem retinens patronum,
Quem tibi summus decus et iuuamen
Praestitit auctor.
Huius o clemens meriti creator
50
Gloriam nobis ueniamque confer,
Quo tui cultus super astra semper
Luce fruamur.
Gloriam patri resonemus omnes.