De aquis calidis Cirnensibus
Ardua montanos inter splendentia lucos
Culmina et indigenis nunc metuenda feris,
Quo deserta prius solum nemus atra tenebat
Tetraque inaccessam sederat umbra uiam:
5
Qua uos laude canam quantoque in carmine tollam,
In quibus extructa est atque locata salus?
Hic etiam ignota stupet ad praetoria feruor
Plenior et calidas terra ministrat aquas.
[Quis sterilem non credat humum? fumantia uernant
10
Pascua, luxuriat gramine cocta silex.]
Innocuos fotus membris parit intima tellus
Naturamque pio temperat igne calor.
[Et cum sic rigidae cautes feruore liquescant,
Contemtis audax ignibus herba uiret.]