Item unde supra scriptum: ubi equi circi bibebant
Creuit ad ornatum stabuli circique decorem
Purior egregio reddita nympha loco,
Quam cingunt uariis insignia clara metallis
Crispatoque super scinditur unda gradu.
5
Excipit hanc patuli moles miranda sepulcri,
Corporibus uiuis pocula blanda parans.
Nec clam sarcophagus tristissima funera claudit,
Sed laetus dulci flumine conplet equos.
Fundit aquas duro signatum marmore Flumen,
10
Falsa tamen species uera fluenta uomit.
Plaudite uos, Musae, diuersaque, plaudite, signa,
Quae circum docili continet arte decor:
Et dum palmiferis post praemia tanta quadrigis
Garrula uictores turba resoluit equos,
15
Praebete innocuos potus potusque salubres,
Vt domino proprius gaudia circus agat.