Inter Christicolas celebres quos fama frequentat

Illustri meritis uenerandae laudis Auito

Excelsi domini famulus Agrestius inquit

Aeternam in Christo mundi creatore salutem.

5

Sancta salutiferi per te mihi tradita uerbi

Institui cupiens suscepi semina corde.

Nunc primum tenerum prorumpere germine fetus

Incipit et sterilis conatur uincere sulcos.

Ex quo si quidquam generosum nascitur, omne

10

Esse tuum fateor. Nam quidquid displicet, illud

Noster ager tenui spinosum cespite gignit,

Aut lolium infelix inter tua sata malignus

Permiscens furtim zezania noxia seuit.

Tu modo sollicitus sollerter suscipe curam

15

Agricolae et nostros paulisper respice fetus.

Ac ne lasciuae generosis frugibus herbae

Officiant uilibusue seges uincatur auenis,

Squalentes tribulos et gramina noxia uelle;

Incultos rastris grauibus circumfode sulcos,

20

Vt transgressa soli gremium iam libera messis

Pullulet et crescens felicibus incrementis

Anxia maturis satiet tua uota maniplis.

Cum Christo segetis domino centesima laetus

Lucra feres fructuque tui potiere laboris.

25

Sed ne suspensum te longa exorsa morentur,

Catholica recti cordis secreta fidelis

Incipiam prompto sermone exponere. Tu uel

Quisquis amans dominum quid credam consulis, audi:

Est pater ingenitus, est Christus, filius eius,

30

Spiritus est sanctus unum qui monstrat utrumque:

Vnica maiestas, uirtus, substantia trini

Nominis, unus honor atque indiscreta potestas.

Qui caelum et terram, mare, fontes, flumina, uentos,

Sensibiles animas, quae pigro in corpore mundi

35

Viuentes carpunt communem hunc aeris usum,

Terrigenosque homines, qui sunt ex semine Adam,

Condidit ex nihilo faciens exordia rerum.

Lignorum fructus et pabula protulit herbae:

Tunc solis radios et cornua surgere lunae

40

Praecipit et stellis numeros et nomina fecit.

Ac sic bis senis disponens mensibus annum

Arua feris, pinnis dedit aera, piscibus aequor.

Omnia post hominem, cui totum condidit orbem.

Quem tamen ut fragili uestiret corpore, bruti

45

Membra soli sacro impleuit spiramine uitae.

Sed quia non solito terreni ponderis usu

Internus oneratur homo, rudis accola mundi

Iussa uerenda dei prior est transgressus adepti

Immemor arbitrii, dum simplex Eua draconi