Sidonius Apollinaris epistulae, uersus inserti 8

Testo base di riferimento: A. Loyen, 1970

Cura dell'edizione digitale: S. Condorelli, 2009

Altre sezioni


9, 5

Quid Cirrham uel Hyantias Camenas,

Quid doctos Heliconidum liquores,

Scalptos alitis hinnientis ictu,

Nunc in carmina commouere temptas,

5

Nostrae o Lampridius decus Thaliae,

Et me scribere sic subinde cogis,

Ac si Delphica Delio tulissem

Instrumenta tuo nouusque Apollo

Cortinam, tripodas, chelyn, pharetras,

10

Arcus grypas agam duplaeque frondis

Hinc bacas quatiam uel hinc corymbos?

Tu iam, Tityre, rura post recepta

Myrtos et platanona peruagatus

Pulsas barbiton atque concinentes

15

Ora et plectra tibi modos resultant,

Chorda, uoce, metro stupende psaltes.

Nos istic positos semelque uisos

Bis iam menstrua luna conspicatur,

Nec multum domino uacat uel ipsi,

20

Dum responsa petit subactus orbis.

Istic Saxona caerulum uidemus

Assuetum ante salo solum timere;

Cuius uerticis extimas per oras

Non contenta suos tenere morsus

25

Altat lammina marginem comarum,

Et sic crinibus ad cutem recisis

Decrescit caput additurque uultus.

Hic tonso occipiti, senex Sygamber,

Postquam uictus es, elicis retrorsum

30

Ceruicem ad ueterem nouos capillos.

Hic glaucis Herulus genis uagatur,

Imos Oceani colens recessus

Algoso prope concolor profundo.

Hic Burgundio septipes frequenter

35

Flexo poplite supplicat quietem.

Istis Ostrogothus uiget patronis

Vicinosque premens subinde Chunos,

His quod subditur, hinc superbit illis.

Hinc, Romane, tibi petis salutem,

40

Et contra Scythicae plagae cateruas,

Si quos Parrhasis ursa fert tumultus,

Eorice, tuae manus rogantur,

Vt Martem ualidus per inquilinum

Defendat tenuem Garumna Thybrim.

45

Ipse hic Parthicus Arsaces precatur,

Aulae Susidis ut tenere culmen

Possit foedere sub stipendiali.

Nam quod partibus arma Bosphoranis

Grandi hinc surgere sentit apparatu,

50

Maestam Persida iam sonum ad duelli

Ripa Euphratide uix putat tuendam;

Qui cognata licet sibi astra fingens

Phoebea tumeat propinquitate,

Mortalem hic tamen implet obsecrando.

55

Haec inter terimus moras inanes;

Sed tu, Tityre, parce prouocare;

Nam non inuideo magisque miror,

Qui, dum nil mereor precesque frustra

Impendo, Meliboeus esse coepi.

 

 

11, 3

Dilectae nimis et peculiari

Phoebus commonitorium Thaliae.

Paulum depositis, alumna, plectris

Sparsam stringe comam uirente uitta,

5

Et rugas tibi syrmatis profundi

Succingant hederae expeditiores.

Soccos ferre caue nec, ut solebat,

Laxo pes natet altus in coturno;

Sed tales crepidas ligare cura,

10

Quales Harpalyce uel illa uinxit,

Quae uictos gladio procos cecidit.

Perges sic melius uolante saltu,

Si uestigia fasceata nudi

Per summum digiti regant citatis

15

Firmi ingressibus atque uinculorum

Concurrentibus ansulis reflexa

Ad crus per cameram catena surgat.

Hoc pernix habitu meum memento

Orpheum uisere, qui cotidiana

20

Saxa et robora corneasque fibras

Mollit dulciloqua canorus arte;

Arpinas modo quem tonante lingua

Ditat, nunc stilus aut Maronianus

Aut quo tu Latium beas, Horati,

25

Alcaeo melior lyristes ipso,

Et nunc inflat epos tragoediarum,

Nunc comoedia temperat iocosa,

Nunc flammant satirae et tyrannicarum

Declamatio controuersiarum.

30

Dic: "Phoebus uenit atque post ueraedos

Remis ueliuolum quatit Garumnam;

Occurras iubet, ante sed parato

Actutum hospitio." Leontioque,

Prisco Liuia quem dat e senatu,

35

Dic: "Iam nunc aderit." Satis facetum et

Solo nomine Rusticum uideto.

Sed si tecta negant ut occupata,

Perge ad limina mox episcoporum,

Sancti et Gallicini manu osculata

40

Tecti posce breuis uacationem,

Ne, si destituor domo negata,

Maerens ad madidas eam tabernas

Et claudens geminas subinde nares

Propter fumificas gemam culinas,

45

Qua serpylliferis olet catenis

Bacas per geminas ruber botellus

Ollarum aut nebulae uapore iuncto

Fumant cum crepitantibus patellis.

Hic cum festa dies ciere rauos

50

Cantus coeperit et uoluptuosam

Scurrarum querimoniam crepare,

Tunc, tunc carmina digniora uobis

Vinosi hospitis excitus Camena

Plus illis ego barbarus susurrem.

10

frondis L N et Mut vid.

frontis T C F