Egressus foribus meis, libelle,
Hanc seruare uiam, precor, memento,
Quae nostros bene ducit ad sodales,
Quorum nomina sedulus notaui;
5
Antiquus tibi nec teratur agger,
Cuius per spatium satis uetustis
Nomen Caesareum uiret columnis;
Sed sensim gradere, ut moras habendo
Affectum celerem noues amicis.
10
Ac primum Domiti larem seueri
Intrabis trepidantibus Camenis:
Tam censorius haud fuit uel ille
Quem risisse semel ferunt in aeuo;
Sed gaudere potes rigore docto:
15
Hic si te probat, omnibus placebis.
Hinc te suscipiet benigna Briuas,
Sancti quae fouet ossa Iuliani,
Quae dum mortua mortuis putantur,
Viuens e tumulo micat potestas.
20
Hinc iam dexteriora carpis arua
Emensusque iugum die sub uno
Flauum crastinus aspicis Triobrem;
Tum terram Gabalum satis niuosam
Et, quantum indigenae uolunt putari,
25
Sublimem in puteo uidebis urbem.
Hinc te temporis ad mei Laconas
Iustinum rapies suumque fratrem,
Quorum notus amor per orbis ora
Calcat Pirithoumque Theseumque
30
Et fidum rabidi sodalem Orestae.
Horum cum fueris sinu receptus,
Ibis Treuidon et calumniosis
Vicinum nimis, heu, iugum Rutenis.
Hic docti inuenies patrem Tonanti,
35
Rectorem columenque Galliarum,
Prisci Ferreolum parem Syagri,
Coniunx Papianilla quem pudico
Curas participans iuuat labore,
Qualis nec Tanaquil fuit nec illa
40
Quam tu, Tricipitine, procreasti,
Qualis nec Phrygiae dicata Vestae
Quae contra satis Albulam tumentem
Duxit uirgineo ratem capillo.
Hinc te Laesora, Caucason Scytharum
45
Vincens, aspiciet citusque Tarnis,
Limosum et solido sapore pressum
Piscem perspicua gerens in unda.
Hic Zeti et Calais tibi adde pennas
Nimbosumque iugum fugax caueto;
50
Namque est assiduae ferax procellae;
Sed quamuis rapido ferare cursu,
Lassum te Vorocingus obtinebit.
Nostrum hic inuenies Apollinarem,
Seu contra rabidi Leonis aestus
55
Vestit frigore marmorum penates,
Siue hortis spatiatur in repostis,
Quales mellifera uirent in Hybla,
Quales Corycium senem beantes
Fuscabat picei latex Galaesi;
60
Siue inter uiolas, thymum, ligustrum,
Serpyllum, casiam, crocum atque caltam,
Narcissos hyacinthinosque flores
Spernit quam pretii petitor ampli
Glebam turifer aduehit Sabaeus;
65
Seu ficto potius specu quiescit
Collis margine, qua nemus reflexum
Natiuam dare porticum laborans
Non lucum arboribus facit, sed antrum.
Quis pomaria prisca regis Indi
70
Hic nunc comparet aureasque uites
Electro uiridante pampinatas,
Cum Porus posuit crepante gaza
Fuluo ex palmite uineam metalli
Gemmarum fluitantibus racemis?
75
Hinc tu Cottion ibis atque Auito
Nostro dicis "aue", dehinc "ualeto".
Debes obsequium uiro perenne;
Nam, dent hinc ueniam mei propinqui,
Non nobis prior est parens amico.
80
Hinc te iam Fidulus, decus bonorum
Et nec Tetradio satis secundus
Morum dotibus aut tenore recti,
Sancta suscipit hospitalitate.
Exin tende gradum Tribusque Villis
85
Thaumastum expete, quemlibet duorum:
Quorum iunior est mihi sodalis
Et collega simul graduque frater;
Quod si fors senior tibi inuenitur,
Hunc pronus prope patruum saluta.
90
Hinc ad consulis ampla tecta Magni
Felicemque tuum ueni, libelle;
Et te bybliotheca qua paterna est,
Qualis nec tetrici fuit Philagri,
Admitti faciet Probus probatum;
95
Hic saepe Eulaliae meae legeris,
Cuius Cecropiae pares Mineruae
Mores et rigidi senes et ipse
Quondam purpureus socer timebant.
Sed iam sufficit: ecce linque portum;
100
Ne te pondere plus premam saburrae,
His in uersibus ancoram leuato.