Quid me, etsi ualeam, parare carmen
Fescenninicolae iubes Diones
Inter crinigeras situm cateruas
Et Germanica uerba sustinentem,
5
Laudantem tetrico subinde uultu
Quod Burgundio cantat esculentus,
Infundens acido comam butyro?
Vis dicam tibi quid poema frangat?
Ex hoc barbaricis abacta plectris
10
Spernit senipedem stilum Thalia,
Ex quo septipedes uidet patronos.
Felices oculos tuos et aures
Felicemque libet uocare nasum,
Cui non allia sordidumque cepe
15
Ructant mane nouo decem apparatus,
Quem non ut uetulum patris parentem
Nutricisque uirum die nec orto
Tot tantique petunt simul Gigantes,
Quot uix Alcinoi culina ferret.
20
Sed iam Musa tacet tenetque habenas
Paucis hendecasyllabis iocata,
Ne quisquam satiram uel hos uocaret.
11
Sidon. epist. 8, 9, 5 v. 34 Burgundio septipes