Pallados armisonae festum dum cantibus ortum

      Personat Hismario Thracia uate chelys,

Et dum Mopsopium stipantur per Marathonem

      Qui steterant fluuii quaeque cucurrit humus,

5

Dulcisonum quatitur fidibus dum pectine murmur,

      Has perhibent laudes laude probasse deam:

"Diua, Gigantei fudit quam tempore belli

      Armatus partus uertice diuiduo,

Quam neque Deliacis peperit Latona sub antris,

10

      Fixura errantem Cyclada pignoribus,

Nec quae Cadmeis pariens Alciden in oris

      Suspendit triplici nocte puerperium,

Nec cuius pluuio turris madefacta metallo est,

      Cum matrem impleret filius aurigena.

15

Sed te, cum trepidum spectaret Phlegra Tonantem,

      Impulit excussam uertice ruptus apex;

Cumque deos solae traherent in proelia uires,

      Confusum ualde te sine robur erat;

Protulit ut mox te patrius, Sapientia, uertex,

20

      Tum mage uicerunt, te cum habuere dei.

Te propter cessit, manibus constructa tremendis,

      Iam prope per rutilum machina tensa polum.

Pindus, Othrys, Pholoe dextris cecidere Gigantum,

      Decidit et Rhoeti iam grauis Ossa manu.

25

Sternitur Aegaeon, Briareus, Ephialta Mimasque,

      Arctoas sueti lambere calce rotas.

Enceladus patri iacuit fratrique Typhoeus;

      Euboicam hic rupem sustinet, hic Siculam."

Hinc sese ad totam genetricem transtulit Orpheus

30

      Et docuit chordas dicere Calliopam.

Assurrexerunt Musae sub laude sororis

      Et placuit diuae carmine plus pietas.

Quod si maternas laudes cantasse fauori est,

      Nec ualeo priscas aequiperare fides;

35

Publicus hic pater est, uoui cui carmen, Auitus;

      Materia est maior, si mihi Musa minor.