Eucheria carmen 1

Testo base di riferimento: S. Santelia, 2005

Cura dell'edizione digitale: V. Russo, 2009

Inserimento e controllo dei dati: A. Prontera, 2023


Eucheriae

Aurea concordi quae fulgent fila metallo

     Setarum cumulis consociare uolo.

Sericeum tegmen, gemmantia texta Laconum,

     Pellibus hircinis aequiperanda loquor.

5

Nobilis horribili iungatur purpura burrae;

     Nectatur plumbo fulgida gemma graui:

Sit captiua sui nunc margarita nitoris

     Et clausa obscuro fulgeat in chalybe:

Lingonico pariter claudatur in aere smaragdus;

10

     Conpar silicibus nunc hyacinthus eat:

Rupibus atque molis similis dicatur iaspis.

     Eligat infernum iam modo luna chaos.

Nunc etiam urticis mandemus lilia iungi,

     Purpureamque rosam dira cicuta premat:

15

Nunc simul optemus despectis piscibus ergo

     Delicias magni nullificare freti;

Auratam crassantus amet, saxatilis anguem,

      Limacem pariter nunc sibi tructa petat;

Altaque iungatur uili cum uulpe leaena,

20

     Perspicuam lyncem simius accipiat;

Iungatur nunc cerua asino, nunc tigris onagro,

     Iungatur fesso concita damma boui.

Nectareum uitient nunc lasera tetra rosatum

      Mellaque cum fellis sint modo mixta malis;

25

Gemmantem sociemus aquam luteumque barathrum;

      Stercoribus mixtis fons eat inriguus.

Praepes funereo cum uulture ludat hirundo;

     Cum bubone graui nunc philomela sonet;

Tristis perspicua sit cum perdice cauanus

30

      Iunctaque cum coruo pulchra columba cubet.

Haec monstra incertis mutent sibi tempora fatis

     Rusticus et seruus si petat Eucheriam!

Eucheriae

Versus Eucheriae poetrie B

It(em) P

om. M L G

AL 390 Riese = 386 Shackleton Bailey