327.
Haec quoque contortis stringens effamina nodis,
Qua sine nil sequitur nilque repugnat item,
In coetum superum ueniens primordia fandi
Aduehit et scholicum praestruit axioma
5
Ambiguis memorans uocem consistere uerbis,
Nil normale putans, ni fuat associum.
Sed licet ipse modos demum bis quinque profatus
Pallens afflictim uerset Aristoteles,
Stoica circumeant ludantque sophismata sensus
10
Perdita non umquam cornua fronte ferant,
Chrysippus cumulet proprium <et> consumat aceruum
Carneadesque parem uim gerat helleboro,
Nullus apex tot prole uirum par accidit umquam,
Nec tibi tam felix sortis honos cecidit:
15
Inter templa deum fas est, Dialectica. fari
Et Ioue conspecto iure docentis agis.
423.
Perita fandi, iam progressum comprime,
Ne inflexa tortos stringat intimatio
Et multinodos perpeti anfractus diu
Hymen recuset. editum est compendio
5
Quicquid decenter docta disputatio
Multo astruendum contulit uolumine.
Sat est, profundae fons decens scientiae,
Quae abstrusa promit nil morosum disserens
Praeteruolando nilque ignotum deserens.
10
Nam quae supersunt fraude multa consita,
Quis falsa captos circuit deceptio,
Dum ambage ficta praestruis sophismata
Captentulisue ludis illigantibus
Pellax soritas cumque sensim congeris,
15
Formasque mendas, comprobat quas ueritas,
Nefas Tonantis garriat sub auribus
Facinusque dirum, quippe summi caelites
Odere turpis omne falsum feminae.
Nam si reuoluas, quid cauilla saeuius?
20
Dudum locuta circulatrix indecens
Fies profecto, decipula si astruseris.
Facessat ergo uersilis profunditas,
Reliquumque tempus liqueris sororibus.
424.
Venerandus mihi fatus, reuerendosque secuta
Referam iussa pedem, atque ilicet exorsa silebunt.
Licet unam decuisset <mihi> permittere culpam,
Vt honoris pretio cederet inferre relatus,
5
Populum Cecropidarum bene quo palliatarum
Bromius conciperet contumias nosse dolere,
Mage quam crediderat uipeream noscere posset,
Et iners Marsica dudum fieret praestigiatrix,
Neque me conspiceret somnificam uel temulentam
10
Loca passim blaterantem Iouialibus sub orsis.
Tamen uni famulandum est tibi, uirgo; reticemus.