Ennius annalium fragmenta 247-253

Reference basis text: O. Skutsch, 1985

Editing of the digital edition: P. Mastandrea, S. Arrigoni, 2014

Data insertion and check: S. Arrigoni

Other sections


247

<proelia promulgantur>

Pellitur e medio sapientia, ui geritur res;

Spernitur orator bonus, horridus miles amatur;

250

Haud doctis dictis certantes, nec maledictis

Miscent inter sese inimicitias agitantes;

Non ex iure manu consertum, sed magis ferro -

Rem repetunt regnumque petunt - uadunt solida ui

247

proelia promulgantur

proeliis promulgatis Cic. Mur. 30

268-273 V.² = 270-275 Fl.

Gell. 20, 10, 4: cumque ille [...] haud usquam inueniri in carminibus Ennii diceret, tum ego hos uersus ex octauo annali absentes dixi - nam forte eos tamquam insigniter praeter alios factos meminerim -: "pellitur ... manu consertum sed magis ferro ... solida ui".

Cic. Mur. 30: etenim, ut ait ingeniosus poeta et auctor ualde bonus, proeliis promulgatis "pellitur e medio" non solum ista uestra uerbosa simulatio prudentiae, sed etiam ipsa illa domina rerum "sapientia; ui geritur res, spernitur orator" non solum odiosus in dicendo et loquax, uerum etiam "bonus, horridus miles amatur". uestrum uero studium totum iacet: "non ex iure manum consertum sed ferro" inquit "rem repetunt".

Cic. fam. 7, 13, 2: tantum metuo ne artificium tuum tibi parum prosit. nam, ut audio, istic "non ex iure manum consertum, sed magis ferro rem repetunt".

Cic. Att. 15, 7: Seruius uero pacificator cum librariolo suo uidetur obisse legationem et omnis captiunculas pertimescere. debuerat autem "non ex iure manu consertum" sed quae sequuntur.

Lact. inst. 5, 1, 5: disceptatione sublata "pellitur ... sapientia, ui geritur res" ut ait Ennius.