Vincla recusanti dedignantique iuuenco
Aspera mordaci subdere colla iugo
Rusticus obliqua succidens cornua falce
Credidit insanum defremuisse pecus,
5
Cautus et immenso ceruicem innectit aratro
(Namque erat hic cornu promptior atque pede),
Scilicet ut longus prohiberet uerbera temo
Neue ictus faciles ungula saeua daret.
Sed postquam irato detractans uincula collo
10
Immeritam uacua calce fatigat humum,
Continuo euersam pedibus dispergit harenam,
Quam in domini Boreas ora sequentis agat.
Tunc hic informi squalentes puluere crines
Discutiens imo pectore uictus ait:
15
"Nimirum exemplum naturae derat iniquae,
Qua fieri posset quis ratione nocens."
[Vix castigatur cui semita recta negatur;
Quod mala mens didicit perdere uix poterit.
Tauro sunt similes prauo quicumque rebelles
20
Quos nec uerba regunt, uerbera nec reprimunt.]