Auianus fabulae 18

Altre sezioni


Quattuor immensis quondam per prata iuuencis

      Fertur amicitiae tanta fuisse fides,

Vt simul emissos nullus diuelleret error,

      Rursus et e pastu turba rediret amans.

5

Hos quoque collatis inter se cornibus ingens

      Dicitur in siluis pertimuisse leo,

Dum metus oblatam prohibet temptare rapinam

      Et coniuratos horret adire boues;

Sed quamuis audax factisque immanior esset,

10

      Tantorum solus uiribus impar erat.

Protinus aggreditur prauis insistere uerbis,

      Collisum cupiens dissociare pecus.

Sic postquam dictis animos disiunxit acerbis,

      Inuasit miserum diripuitque gregem.

15

Tunc quidam ex illis "Vitam seruare quietam

      Qui cupiet, nostra discere morte potest.

[Neue cito admotas uerbis fallacibus aures

      Impleat aut ueterem deserat ante fidem."]