Auianus fabulae 15

Altre sezioni


Threiciam uolucrem fertur Iunonius ales

      Communi sociam conteruisse cibo

(Namque inter uarias fuerat discordia formas,

      Magnaque de facili iurgia lite trahunt)

5

Quod sibi multimodo fulgerent membra decore,

      Caeruleam facerent liuida terga gruem;

Et simul erectae circumdans tegmina caudae

      Sparserat arcatum sursus in astra iubar.

Illa licet nullo pennarum certet honore,

10

      His tamen insultans uocibus usa datur:

"Quamuis innumerus plumas uariauerit ordo,

      Mersus humi semper florida terga geris:

Ast ego deformi sublimis in aera penna,

      Proxima sideribus numinibusque feror."