Ecce sub accensis altaribus ossa piorum
Regia purpureo marmore crusta tegit.
Hic et apostolicas praesentat gratia uires
Magnis in paruo puluere pignoribus.
5
Hic pater Andreas et magno nomine Lucas
Martyr et illustris sanguine Nazarius;
Quosque suo deus Ambrosio post longa reuelat
Saecula, Protasium cum pare Geruasio.
Hic simul una pium complectitur arcula coetum
10
Et capit exiguo nomina tanta sinu.