Hic reparandarum generator fons animarum
Vinum diuino lumine flumen agit.
Sanctus in hunc caelo descendit spiritus amnem
Caelestique sacras fonte maritat aquas;
5
Concipit unda deum sanctamque liquoribus almis
Edit ab aeterno semine progeniem.
Mira dei pietas: peccator mergitur undis,
Mox eadem emergit iustificatus aqua.
Sic homo et occasu felici functus et ortu
10
Terrenis moritur, perpetuis oritur.
Culpa perit, sed uita redit; uetus interit Adam,
Et nouus aeternis nascitur imperiis.