Per cineres Pauli, per cani limina Petri,
Ne laceres uersus, dux Iacobe, meos.
Sic tua pro clipeo sustentet pectora Thomas
Et comes ad bellum Bartholomaeus eat;
5
Sic ope sanctorum non barbarus inruat Alpes,
Sic tibi det uires sancta Susanna suas;
Sic quicumque ferox gelidum transnauerit Histrum,
Mergatur uolucres ut Pharaonis equi;
Sic Geticas ultrix feriat romphaea cateruas
10
Romanasque regat prospera Thecla manus;
Sic tibi det magnum moriens conuiua triumphum
Atque tuam uincant dolia fusa sitim;
Sic numquam hostili maculetur sanguine dextra:
Ne laceres uersus, dux Iacobe, meos.