Accipe parua tuae, princeps uenerande, sororis
Munera, quae manibus texuit ipsa suis,
Dumque auro phalerae, gemmis dum frena renident,
Hac uterum zona cinge frementis equi,
5
Siue illum Armeniis aluerunt gramina campis
Turbidus Argaea seu niue lauit Halys,
Sanguineo uirides morsu uexare zmaragdos
Et Tyrio dignum terga rubere toro.
O quantum formae sibi conscius erigit armos
10
Spargit et excussis colla superba iubis!
Augescit breuitas doni pietate Serenae,
Quae uolucres etiam fratribus ornat equos.