Quidnam soliuagus, Bucole, tristia
Demissis grauiter luminibus gemis?
Cur manant lacrimis largifluis genae?
Fac, ut norit amans tui!
5
Aegon, quaeso, sinas alta silentia
Aegris me penitus condere sensibus.
Nam uulnus reserat, qui mala publicat,
Claudit, qui tacitum premit.
Contra est quam loqueris, recta nec autumas.
10
Nam diuisa minus sarcina fit grauis,
Et quicquid tegitur, saeuius incoquit.
Prodest sermo doloribus.
Scis, Aegon, gregibus quam fuerim potens,
Vt totis pecudes fluminibus uagae
15
Complerent etiam concaua uallium,
Campos et iuga montium:
Nunc lapsae penitus spes et opes meae,
Et longus peperit quae labor omnibus
Vitae temporibus, perdita biduo.
20
Cursus tam litus est malis!
Haec iam dira lues serpere dicitur.
Pridem Pannonios, Illyrios quoque
Et Belgas grauiter strauit et impio
Cursu nos quoque nunc petit.
25
Sed tu, qui solitus nosse salubribus
Sucis perniciem pellere noxiam,
Cur non anticipans, quae metuenda sunt,
Admosti medicas manus?
Tanti nulla metus praeuia signa sunt,
30
Sed quod corripit id morbus et opprimit:
Nec languere sinit nec patitur moras.
Sic mors ante luem uenit.
Plaustris subdideram fortia corpora
Lectorum studio, quo potui, boum,
35
Queis mentes geminae, consona tinnulo
Concentu crepitacula,
Aetas consimilis saetaque concolor;
Mansuetudo eadem, robur idem fuit
Et fatum: medio nam ruit aggere
40
Par uictum parili nece.
Mollito penitus farra dabam solo:
Largis putris erat glaeba liquoribus,
Sulcos perfacilis stiua tetenderat,
Nusquam uomer inhaeserat:
45
Laeuus bos subito labitur impetu,
Aestas quem domitum uiderat altera
Tristem continuo disiugo coniugem,
Nil iam plus metuens mali;
Dicto sed citius consequitur necem,
50
Semper qui luerat sanus et integer;
Tunc longis quatiens ilia pulsibus
Victum deposuit caput.
Angor, discrucior, maereo, lugeo.
Damnis quippe tuis non secus ac meis
55
Pectus conficitur. sed tamen arbitror
Saluos esse greges tibi?
Illuc tendo miser; quo grauor acrius.
Nam solamen erat uel minimum mali
Si fetura daret posterior mihi,
60
Quod praesens rapuit lues.
Sed quis uera putet, progeniem quoque
Extinctam pariter? uidi ego cernuam
Iunicem grauidam, uidi animas duas
Vno in corpore perditas!
65
Hic fontis renuens, graminis immemor
Errat succiduo bucula poplite;
Nec longum refugit, sed grauiter ruit
Leti compede claudicans.
At parte ex alia, qui uitulus modo
70
Lasciuas saliens texuerat uias,
Vt matrem subiit, mox sibi morbido
Pestem traxit ab ubere.
Mater tristifico uulnere saucia,
Vt uidit uituli condita lumina,
75
Mugitus iterans ac misere gemens
Lapsa est et uoluit mori.
Tunc tamquam metuens, ne sitis aridas
Fauces opprimeret, sic quoque dum iacet,
Admouit <moriens> ubera mortuo.
80
Post mortem pietas riget.
Hinc taurus solidi uir gregis et pater,
Ceruicis ualidae frontis et arduae,
Laetus dum sibimet plus nimio placet,
Prato concidit herbido.
85
Quam multis foliis silua cadentibus
Nudatur gelidis tacta aquilonibus,
Quam densis fluitant uelleribus niues,
Tam crebrae pecudum neces.
Nunc totum tegitur funeribus solum;
90
Inflantur tumidis corpora uentribus,
Albent liuidulis lumina nubibus,
Tenso crura rigent pede.
Iam circum uolitant agmina tristium
Dirarumque auium, iamque canum greges
95
Insistunt laceris uisceribus frui,
Heu cur non etiam meis?
Quidnam, quaeso, quid est, quod uario modo
Fatum triste necis transilit alteros
Affligitque alios? en tibi Tityrus
100
Saluo laetus agit grege!
Ipsum contueor. dic age, Tityre:
Quis te subripuit cladibus his deus,
Vt pestis pecudum, quae populata sit
Vicinos, tibi nulla sit?
105
Signum, quod perhibent esse crucis dei,
Magnis qui colitur solus in urbibus,
Christus, perpetui gloria numinis,
Cuius filius unicus.
Hoc signum mediis frontibus additum
110
Cunctarum pecudum certa salus fuit.
Sic uero deus hoc nomine praepotens
Saluator uocitatus est.
Fugit continuo saeua lues greges,
Morbis nil licuit. si tamen hunc deum
115
Exorare uelis, credere sufficit:
Votum sola fides iuuat.
Non ullis madida est ara cruoribus
Nec morbus pecudum caede repellitur,
Sed simplex animi purificatio
120
Optatis fruitur bonis.
Haec si certa probas, Tityre, nil moror,
Quin ueris famuler religionibus.
Errorem ueterem defugiam libens,
Nam fallax et inanis est.
125
Atqui iam properat mens mea uisere
Summi templa dei. quin, age, Bucole,
Non longam pariter congredimur uiam,
Christi et numina noscimus?
Et me consiliis iungite prosperis.
130
Nam cur addubitem, quin homini quoque
Signum prosit idem perpete saeculo,
Quo uis morbida uincitur?