O qui uenustos uberi facundia
Sales opimas, Tetradi,
Cauesque ne sit tristis et dulci carens
Amara concinnatio,
5
Qui felle carmen atque melle temperans
Torpere Musas non sinis
Pariterque fucas quaeque gustu ignaua sunt
Et quae sapore tristia,
Rudes Camenas qui Suessae praeuenis
10
Aeuoque cedis, non stilo,
Cur me propinquum Santonorum moenibus
Declinas, ut Lucas boues
Olim resumpto praeferoces proelio
Fugit iuuentus Romula?
15
Non ut tigris te, non leonis impetu,
Amore sed caro expeto.
Videre alumni gestio uultus mei
Et indole optata frui.
Inuitus olim deuoraui absentiae
20
Necessitatem pristinae,
Quondam docendi munere astrictum graui
Iculisma cum te absconderet,
Et inuidebam deuio ac solo loco
Opus Camenarum tegi.
25
At nunc, frequentes atque claros nec procul
Cum floreas inter uiros
Tibique nostras uentus auras deferat
Auresque sermo uerberet,
Cur me supino pectoris fastu tumens
30
Spernis poetam consulem,
Tuique amantem teque mirantem ac tua
Desiderantem carmina
Oblitus alto neglegis fastidio,
Plectendus exemplo tuo
35
Ni stabilis aeuo pectoris nostri fides
Quamquam recusantes amet?
Vale. ualere si uoles me, peruola
Cum scrinio et musis tuis.
Ausonius Tetradio suo sal(utem) plu(rimam) di(cit) C
Ausonius Tetradio sal(utem) d(icit) K
Ausonius Tetradio sal(utem) T
codices
C = Padova, Biblioteca Capitolare C. 64 (saec. XV)
K = London, British Library, Kings 31 (1475)
M = Firenze, Biblioteca Nazionale Centrale, Magl. VI.29 (saec. XIV)
L = Firenze, Biblioteca Medicea Laurenziana, Plut. 51.13 (1490-1500)
T = Leiden, Bibliotheek der Rijksuniversiteit, VLQ 107 (saec. XV-XVI)
Z = consensus C K M (L) T