Praecatio consulis designati pridie Kal. iam fascibus sumptis
Iane ueni, nouus anne, ueni, renouate ueni Sol,
Consulis Ausonii Latiam uisure curulem.
Ecquid ab Augusta nunc maiestate secundum
Quod mireris habes? Roma illa domusque Quirini
5
Et toga purpurei rutilans praetexta senati
Hoc capite aeternis signat sua tempora fastis.
Anne, bonis coepte auspiciis, da uere salubri
Apricas uentorum animas, da roscida Cancro
Solstitia et gelidum Borean Septembribus horis.
10
Mordeat autumnis frigus subtile pruinis
Et tenuata modis cesset mediocribus aestas.
Sementem notus umificet, sit bruma niualis,
Dum pater antiqui renouatur Martius anni.
Spiret odorato florum noua gratia Maio,
15
Iulius et segetes coquat et mare temperet euris,
Sirius ardentem non augeat igne Leonem;
Discolor arboreos uariet Pomona sapores,
Mitiget autumnus, quod maturauerit aestas,
Et genialis hiems parta sibi dote fruatur.
20
Pacem mundus agat nec turbida sidera regnent:
Nulla tuos, Gradiue, offendat stella penates
Quae non aequa tibi, non Cynthia, non celer Arcas
Finitimus terris, non tu, Saturne, supremo
Vltime circuitu; procul a Pyroente remotus
25
Tranquillum properabis iter. uos comminus ite,
Stella salutigeri Iouis et Cythereie Vesper;
Nonnumquam hospitibus facilis Cyllenius adsit.
Iane ueni, nouus anne, ueni, renouate ueni Sol.
Hostibus edomitis, qua Francia mixta Suebis
30
Certat ad obsequium Latiis ut militet armis,
Qua uaga Sauromates sibi iunxerat agmina Chuni,
Quaque Getes sociis Histrum assultabat Alanis
(Hoc mihi praepetibus Victoria nuntiat alis),
Iam uenit Augustus, nostros ut comat honores,
35
Officio exornans quos participare cupisset.
Iane ueni, nouus anne, ueni, renouate ueni Sol.
Aurea uenturo, Sol, porrige gaudia Iano:
Fascibus Ausonii succedet Caesar in annum,
Quintam Romulei praetextam habiturus honoris.
40
Ecce ubi se cumulat mea purpura (mitibus audi
Auribus hoc, Nemesis) post me dignatur oriri
Augustus consul; plus quam conferre uidetur
Me sibi, qui iussit nostros praecedere fasces.
Iane ueni, nouus anne ueni, renouate ueni Sol,
45
Coge secuturos bis sena per ostia menses.
Tu tropicum solido da cedere, rursus et illum
Terga dare, ut duplex tropico uarietur ab astro
Et quater a ternis properet mutatio signis.
Aestiuos impelle dies brumamque morantem
50
Noctibus acceleret promissus Caesaris annus.
Illum ego si cernam, tum terque quaterque beatus,
Tunc ero bis consul, tunc tangam uertice caelum.
Praecatio consulis designati pridie Kal. iam fascibus sumptis V
codex unicus
V = Leiden, Bibliotheek der Rijksuniversiteit, VLF 111 (saec. IX)