Ausonius eclogae 25 = XXXV Schenkl = ecl. 8 Peiper = ecl. 7 Prete = XVIII Gnomica 2 Combeaud

Testo base di riferimento: R. P. H. Green, 1999

Cura dell'edizione digitale: A. Prontera, 2023

Altre sezioni


De ratione puerperii maturi

Omnia quae uario rerum metimur in actu

Astrorum dominatus agit terrenaque tantum

Membra homini. e superis fortuna et spiritus auris

Septeno moderanda choro, sed praesidet ollis

5

Sortitus regimen nitidae sol aureus aethrae.

Nec sola in nobis moderatur tempora uitae

Dum breue solliciti spatium producimus aeui;

Creditur occultosque satus et tempora uitae

Materno ducenda utero formare uidendo

10

Et nondum exortae leges componere uitae.

Namque ubi conceptus genitali insederit aruo,

Haud dubium solem cuicumque insistere signo.

Qui cum uicini stationem ceperit astri,

Contiguos nullum transfundit lumen in ortus.

15

Ast ubi conuersis post menstrua tempora habenis

Scandit purpureo iam tertia sidera curru,

Obliqua exilem demittit linea lucem,

Aspirans tenues per inertia pondera motus.

Quarta in sede uiget primi indulgentia solis,

20

Suadet et infusus teneros coalescere fetus.

Fulgor tetragono aspectu uitale coruscat,

Clarum et lene micans, quintique <e> cardine signi

Incutit attonitam uegetato infante parentem.

Nam sexto uis nulla loco, quia nulla tuendi

25

Aequati lateris signatur regula Phoebo.

Ast ubi signiferae media in regione cohortis

Septimus accepit limes rutilantia flammis

Recto castra situ, turgentis foedera partus

Iam plena sub luce uidet, nec fulgura parci

30

Luminis intendens toto fouet igne coronae.

Hinc illud, quod legitimos Lucina labores

Praeuenit et grauidos sentit subrepere nixus

Ante exspectatum festina puerpera uotum.

Quod nisi septeno cum lumina fudit ab astro

35

Impulerit tardi claustra obluctantia partus,

Posterior nequeat, possit prior. an quia sexto

Aemulus octaui conspectus inutilis astri

Nescit compariles laterum formare figuras?

Sed nono incumbens signo cunctantia matrum

40

Vota leuat, trigono uiris sociante sequenti.

At si difficilis trahit Ilithyia retrorsum,

Tetragono absoluet dubiarum uincla morarum.

de ratione puerperii maturi V

codex unicus
V = Leiden, Bibliotheek der Rijksuniversiteit, VLF 111 (saec. IX)