Nunc et Apollineos Tiberina per ostia ludos
Et Megalesiacae matris operta loquar,
Vulcanique dies, autumni exordia primi,
Quinquatrusque deae Pallados expediam,
5
Et medias idus Mai Augustique recursu,
Quas sibi Mercurius quasque Diana dicat,
Matronae quae sacra colant pro laude uirorum,
Mauortis primi cum rediere dies.
Festa Caprotinis memorabo celebria nonis,
10
Cum stola matronis dempta tegit famulas.
[Quattuor illa etiam discretis partibus anni
Solstitia et luces nocte dieque pares.]
Nec Regifugium pulsis ex urbe tyrannis
Laetum Romanis fas reticere diem.
15
Visne Opis ante sacrum uel Saturnalia dicam
Festaque seruorum, cum famulantur eri,
Et numquam certis redeuntia festa diebus,
Compita per uicos cum sua quisque colit,
Aut duplicem cultum, quem Neptunalia dicunt
20
Et quem de Conso consiliisque uocant,
Festa haec nauigiis aut quae celebrata quadrigis
Iungunt Romanos finitimosque duces?
Adiciam cultus peregrinaque sacra deorum,
Natalem Herculeum uel ratis Isiacae,
25
Nec non lasciui Floralia laeta theatri,
Quae spectare uolunt qui uoluisse negant.
Nunc etiam ueteres celebrantur Equirria ludi:
Prima haec Romanus nomina circus habet.
Et Dionysiacos Latio cognomine ludos
30
Roma colit, Liber, cum tibi uota dicat.
Aediles etiam plebi aedilesque curules
Sacra sigillorum nomine dicta colunt.
Et gladiatores funebria proelia notum
Decertasse foro; nunc sibi harena suos
35
Vindicat, extremo qui iam sub fine Decembris
Falcigerum placant sanguine Caeligenam.